La Capèla-de-Balaguièr, Roergue, Guiana
Coma son nom l’indica encara uèi, lo vilatge de La Capèla (La Capelle-Balaguier, 12) dependiá de l’importanta baronia dels senhors de Balaguièr que contrarotlavan tota aquesta partida del bacin d’Òlt, a caval entre Roergue e Carcin. Aqueste linhatge de primièr plan per aquestes paisses, es estat estudiat mas garda encara plan de secrets1.
D’efièch, aqueste linhatge aviá, tre los sègles 12 e 13, d’importants domenis. A l’Atge-Mejan, trobam los Balaguièr coma senhors de Balaguièr (Balaguier-d’Olt, 12), de La Capèla (La Capelle-Balaguier, 12), de Montsalés (Montsalès, 12), co-senhors dominants de Capdenac (Capdenac-le-Haut, 46), de Salvanhac (Salvagnac-Cajarc, 46), de Cajarc (Cajarc, 46)… Balhèron un abat a Fijac (Figeac, 46), mantuns canonges del capítol de Rodés (Rodez, 12), un baile del comte de Rodés pel Carladés, eca…
A proximitat del vilatge, un ostalàs consèrva los vestigis d’un ancian castèl d’aquestes senhors. Son nom evòca Sant Jòrdi, sant guerrièr, sovent associat a de punts fortificats. Conserva una tor carrada medievala al centre del bastiment. Aital, i trobam l’entrada de l’ostal que mena a un escalièr monumental, cobèrt per doas crosadas d’ogivas ont figuran, a tres represas, las armas de la familha de Balaguièr : « d’aur a tres faissas de vermelh ».
L’escut dels senhors de Balaguièr es escultat sus las doas claus de vòlta e sus un culòt coma se pòt observar mai en detalh sus las fotòs seguentas.
Mercejam los proprietaris del luòc que nos an aculhits en lenga nòstra e qu’an ben volgut acceptar de nos daissar far aquestas fotòs per illustrar nòstre article.
Olivièr Daillut-Calvignac
