Senèrgas, glèisa Sant Martin

Lo pichon vilatge de Senèrgas (Sénergues, 12), situat sus un platèu granitic a qualques quilomètres a l’èst de Concas (Conques, 12), foguèt un cap-luòc de vigariá carolingiana e lo sèti d’un priorat dependent de la celèbra abadiá benedictina vesina.

Pròcha del castèl datable dels sègles 14 e 15¹, la glèisa parroquiala gotica es estada tornada bastida al sègle 16 per l’abat Antòni de Rosselet (1520-1540)². Sas armas « de … al sautor alisat o flanquís de … ; al cap de … cargat de tres besants o tortèls de… » figuran al dessús del portal d’entrada del sanctuari. L’escut i es dominat per la cròça e la mitra abadialas. Pel moment, totas nòstras recèrcas sus aqueste personatge, son linhatge³ e son identitat eraldica son demoradas sens resultat per conéisser los esmalts d’aqueste escut mas remarcam la preséncia del flanquís, mòble pro comun dins l’eraldica de Nauta-Auvernha.

• 

• 

Aqueste personatge d’origina auvernhassa sembla èsser estat un abat bastidor e los edificis ont trobam sas armas representadas son pro nombroses dins lo ròdol de Concas⁴. Las podèm encontrar dins la glèisa de Sant Cibrian de Dordon (Saint-Cyprien-sur-Dourdou, 12) e las tornam trobar encara sus un fragment de pilar d’origina desconeguda utilizat en remplèc sus la faciada d’un ostal del Vern, un mas vesin del vilatge sus la comuna de Senèrgas.  

Podèm tanben senhalar la preséncia dins la glèisa de Senèrgas de doas claus de volta dins la nau, caduna cargada d’una crotz patuda.

Olivièr Daillut-Calvignac

1. Sul domnon del sègle 14 e la sala senhoriala costejada d’una tor redonda del sègle 15, veire J.Miquel, L’architecture militaire dans le Rouergue au Moyen-Âge, ed. françaises d’arts graphiques, 1981, vol.1 p.65 e vol.2 p.64-65.
2. P. de la Malène, Parcours romans en Rouergue, ed.du Rouergue, T.1, p.238-239.
3. Èra probablament parent ambe Pèire Rosselet, procuraire del rei e Raimond Rosselet qu’ocupava las meteissas fonccions e participèt a la redaccion de las costumas d’Auvernha en 1510.
4. P.Lançon/J.Poulet, Le trésor héraldique de Conques,  in Etudes Aveyronnaises, 1995.