Las edicions Yoran an publicat en 2019 « L’histoire de l’Occitanie » escricha en francés per l’istorian Felip Martel1. Aqueste obratge de referéncia retraça en 333 paginas las grandas linhas de l’istòria dels paisses de lenga d’òc.
Felip Martel capita de nos balhar un agach general sus l’ensemble de la zòna culturala occitana tot en destriant la singularitat de sos parçans sens mancar de joslinhar la pertinéncia de sa globalitat. L’autor evita l’escritura d’un roman nacional dolent o revindicatiu per s’inscriure plenament dins una demarcha scientifica de reconquèsta de l’istoriografia occitana apiejada sus un punt de vista occitan.
A la demanda de l’editor, avèm participat a las importantas anèxas de l’obratge (un centenant de paginas) per prepausar una presentacion rapida de las armariás de las principalas províncias occitanas en 28 paginas illustradas.
Aital, las armas de las sèt províncias de Guiana, Gasconha, Provença, Lengadòc, Lemosin, Daufinat e Auvernhe son presentadas e estudiadas dins loras evolucions istoricas e eraldicas. I avèm ajustat l’estudi d’armariás caracteristicas de paisses a fòrta identitat coma los de la zòna pirenenca (Biarn, Bigòrra, Aran, Comenge e Fois), dels paisses « centrals » (Peiregòrd, Carcin, Roergue, Gevaudan) coma periferic ambe la Contèa de Niça. L’editor a cregut bon d’i ajustar un darrièr paragraf critic de l’identitat eraldica de la region PACA sens grand interèst, abans de tornar a nòstra conclusion generala.
Vos convidam a legir aqueste obratge que fa lo punt sus l’istòria d’Occitània en lo comandant sus https://www.libraria-occitana.org/produit/histoire-de-loccitanie-le-point-de-vue-occitan/ o encara https://www.decouvertes-occitanes.fr/fr/histoire-et-societe/1286-histoire-de-l-occitanie-philippe-martel-9782367470597.html
